By
Okalani Etuati
VAEGA 68
Taeao Manuia, Taeao Toto’a i le mamalu o le tatou aufaitau nusipepa i lenei taeao fou. Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou. E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.
Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 68.
*****************************************************
Na umi se taimi o nonofo le alii fomai o Taki ma lona tina, le fafine o Elena, ua leai se tasi e toe tautala.
Ae o le taimi lea, na vaaia ai e Taki le maligi lemu ifo o loimata o si ona tina ma ia oso atu ai i le opo mai lona tina ma taumafai e faamafanafana atu ia te ia.
“Mom, o lea ua ou sauni e valaau le tatou loia po o le a sana fautuaga e tusa ai ma lenei mataupu. Ou te mana’o e fai sau tagi e faasaga i le tamaloa lea ma lana mea lea ua fai,” o le tala tau faamafanafana atu lea a Taki i lona tina.
Ae na fa’ate’ia le alii fomai i le faapea mai o lona tina, “E leai, e te le faia se mea faapena.”
“O le a le uiga o lau tala? Se’i vaai ai i le mea a le tamaloa lea ua fai. Ua le gata i le igoa o lo’u tama, ae faapea foi mea uma e uiga i lona olaga, ua ia fa’aaoga e fa’asao mai ai lona alu i le falepuipui. Ma o ai na iai i le falemai i lena vaitaimi, ailoga lava na fai iai se tala faapea a Dad. O pepelo uma mea a le tamaloa lea ua fai,” o le tala lea a Taki ma lona leo ua si’isi’i ifo lava i lona ita tele.
Sa vaaia e Taki le ataata o lona tina ma tumafai e solo ese loimata mai ona foliga.
“E leai, e le o pepelo si tamaloa o Tanielu,” o le tala mai lea a le fafine o Elena. “Ou te talitonu o le mea moni lena sa tupu.”
“E faafefea na e iloa?” o le toe oso mai lea a Taki ua amata ona le fiafia mai i lona tina ma ana faamatalaga.
“Aua sa ou lagonaina le faamaoni ma le agaga alofa o le tamaloa o Tanielu a’o tatou iai faatasi i lalo o le fale lenei, i le taimi na outou tafafao mai ai,” o le tali atu lea a le fafine o Elena i lana tama.
“Sau si a’u tama e nofo mai i lalo se’i o’u faamatala atu le mea ia te oe,” o le augani atu lea a Elena i si ana tama, lea ua leiloga se mea e femasia’i solo ai i lona loto ita.
“Fa’alogo faalelei mai oe si a’u tama,” o le tala filemu lea a le fafine o Elena i le alii o Taki, “Ou te iloa, e moni ma faamaoni le faamatalaga a Tanielu sa fai e uiga i le mea na tupu i le falemai. E mafua ona ou iloa e faamaoni lea tulaga, ona o le taimi na soifua ai lou tama, e le uma ona talanoa i si ana uo lea na faasaoina mai o ia mai i le falepuipui.”
“O taimi uma lava sa ma faatasi ai ma lou tama, a’o soifua o ia, e talanoa mai lava o ia, o si ana uo o Alesana, o se tagata loto maualalo, o se tagata alofa, o se tagata faamaoni. Ma ou te talitonu na mafua ona sui le igoa a Alesana, i le igoa o lou tama o Tanielu, ona o le mana’o a lout ama. Ua e iloa? E le na o se uo, ia Alesana i lou tama, ae sa ta’u o ia, o se uso, i lout ama,” o le faamatalaga lea a le fafine o Elena ma ua atili ai ona maligi ona loimata.
“O le mea lea, si a’u tama pele, fa’amalie lou loto. Tu’u loa lou ita. Ma taumafai e faamagalo atu ia Alesana, ia po o Tanielu foi. Aua o Alesana, o lou tama lava lena,” o upu mulimuli ia a le fafine o Elena na fa’ate’ia tele ai le loto a le alii fomai o Taki, ua leai seisi ana tala e mafai ona toe fai mai i lona tina.
[E FAIA PEA]
Section:
Le Lali
View the discussion thread.
Continue reading...